Verkmenntaskólinn á Akureyri

Á haustönn 2010 hefja 1310 nemendur nám við Verkmenntaskólann á Akureyri. Nemendafjöldinn er svipaður og hann var haustið 2009 og færri komast í skólann en vilja þar sem nær 100 umsóknum var hafnað. Nýnemar sem hefja skólagöngu þetta haustið eru 214. Aðsókn á hinar ýmsu brautir er oft meiri en skólinn ræður við og þarf því að beita inntökuskilyrðum inn á þær eins og t.d. háriðn og sjúkraliðanám. Metaðsókn er í grunndeild matvæla- og veitingagreina og grunndeild málm- og véltæknigreina. Þá heldur áfram á milli ára nemendaaukning á listnámsbraut, íþróttabraut og viðskipta- og hagfræðibraut. Eina brautin þar sem hefur orðið fækkun er í grunndeild byggingagreina sem markast vafalítið af því atvinnuástandi sem er í byggingaiðnaði og að nemendur skólans komast ekki á námssamning hjá meisturum eða fyrirtækjum.

Innritun í fjarnám er lokið og þar hefur orðið fækkun á milli ára sem er m.a. vegna þess að um síðustu áramót var framhaldsskólum gert að fækka nemendaíglildum á þeim vettvangi um helming til þess að ná fram sparnaði. Þá þurfa nemendur nú að greiða hærra einingagjald í fjarnámi núna miðað við fyrri ár.

Í sumar lauk framkvæmdum við nýbyggingu við D-álmu þar sem aðstaða fyrir fjölfatlaða nemendur skólans er stóraukin. Byggingin hefur ekki formlega verið afhent skólanum og enn vantar aðeins upp á að öll tæki og tól séu til staðar en það stendur til bóta á næstu dögum. Í nýbyggingunni eru einnig tvær almennar kennslustofur ásamt vel útbúnum sérkennslustofum sem bæta mjög aðstöðu til kennslu fjölfatlaðra nemenda.

Félagslíf nemenda hefst um leið og skólinn byrjar og þar ber fyrst að nefna Busahátíð sem fram fór 26. ágúst. Framundan eru nýnemaferðir þar sem umsjónarkennarar, kennarar og stjórnendur skólans fara í dagsferð með nemendum með það markmið að leiðarljósi að kynnast hvert öðru. Fljótlega fer síðan klúbbastarfsemi nemendafélagsins af stað.

Kennarar, stjórnendur og starfsfólk skólans óska nemendum góðs gengis á önninni.

Fimmtudaginn 19. ágúst mæta nýnemar (útskrifaðir úr grunnskóla vorið 2010)
kl. 8.30 í Gryfjuna og hitta umsjónarkennara sína.

Nemendur fæddir 1993 og eldri sem hafa ekki verið nemendur skólans áður mæta einnig í Gryfjuna kl. 8.30 til að fá nánari upplýsingar um skólann og hitta námsráðgjafa og kennslustjóra sína.

Kennsla hefst samkvæmt stundaskrá fimmtudaginn 19. ágúst kl. 09:55. Greiðsluseðlar vegna efnisgjalda verða sendir á lögheimili nemenda fljótlega eftir að skóli hefst.

Starfsfólk VMA býður nemendur skólans velkomna á nýju skólaári með góðum óskum um gott gengi.

Miðvikudaginn 18. ágúst verður afhending stundataflna í Gryfjunni og nemendur beðnir að mæta á eftirfarandi tímum til að sækja stundatöflur sínar:

• Kl. 09-11 nemendur á Tæknisviði
• Kl. 11-12 nemendur á Almennri braut, Listnámsbrautum, Matvælasviði og á Starfsbraut
• Kl. 13-15 nemendur á öðrum brautum

Lesa meira