HÖTE2VE06(AV) - Vefnaður

bindifræði, vefnaður

Einingafjöldi: 6
Þrep: 2
Forkröfur: HÖTE2HU05

Í áfanganum lærir nemandinn um gildi vefnaðar fyrr og nú. Hann tekur virkan þátt í uppsetningu á vef í vefstól og vefur a.m.k. þrjú misstór stykki og þrjár prufur. Lögð er áhersla á einskeftuvefnað og vaðmál í prufum. Nemandinn lærir að þekkja muninn á band-, þráðar- og jafnþráða áferð í vefnaði. Í stykkjum og prufum með bandáferð er lögð áhersla á einskeftu- og rósabandavefnað. Í prufum með þráðaráferð er lögð áhersla á þráðarbrekán og með jafnþráða áferð er lögð áhersla á að nemandinn kynnist salúnvefnaði, litafléttum í einskeftu og vaðmáli og knipplingavefnaði eða öðrum skyldum aðferðum. Lögð er áhersla á að nemendur læri bindifræði og haldi vinnumöppu allan áfangann.

Þekkingarviðmið

mikilvægi vefnaðar í lífinu almennt og menningarlegu gildi hans, sérkennum og sögu
mismunandi vefstólum og muninum á trissuvefstól og gagnbindingarvefstól
umhirðu þeirra áhalda sem notuð eru
mismunandi tækjum og tólum sem tilheyra vefnaði
fagtungumáli og þeim hugtökum sem notuð eru í vefnaði
frumbindingum í vef þ.e. einskeftu, vaðmáli og ormeldúk
mismunandi þráðum sem notaðir eru í vefnaði s.s. endurnýtanlegu efni, ullarbandi, bómull og hör
stigtölum/lotunúmerum mismunandi vefjarefna
bindifræðiforriti sem notað er í áfanganum
mismunandi inndráttarmunstrum fyrir einskeftu, rósaband, salúnvefnað og litafléttur í einskeftu og vaðmáli og hvaða þýðingu þau hafa
muninum á einföldum uppbindimunstrum og stigmunstrum

Leikniviðmið

reikna út í slöngu með mismunandi vefjarefnum fyrir einfaldar bindingar
beita af öryggi bindifræðiforriti fyrir vefnað á sjálfstæðan og skapandi hátt
rekja í slöngu upp að a.m.k. 250 þráðum
þræða í forskeið og reikna út í hana
rifja í vefstól og setja upp vef í vefstól í samvinnu við nemendur og kennara
spóla mismunandi vefjarefni á garnvindu, dokkuvindu og spólurokk
vefa einfaldar prufur í band-, þráðar og jafnþráða áferð í trissuvefstól
beita líkamanum á réttan hátt við vinnu sína og verklag í vefnaði
beita skapandi aðferðum í vefnaði t.d. með lita- og efnisnotkun

Hæfnisviðmið

nýta sér mismunandi aðferðir og verkkunnáttu í vefnaði og bindifræði
leysa af hendi verkefni undir leiðsögn kennara
túlka verkefni og útfæra þau og búa yfir sjálfstrausti við vinnu verkefna
skilja menningarsögulegt og lýðræðislegt hlutverk textíls, handverks, hönnunar og vefnaðar hjá íslendingum og öðrum þjóðum
vera fær um að taka þátt í uppbyggilegri og frjórri samræðu um verk sín og annarra í vefnaði
ígrunda og rökstyðja lita- og efnisval sitt bæði í verklegum og tæknilegum útfærslum í bindifræði og vefnaði
greina styrk sinn og nýta sér hann í verkefnavali, undir leiðsögn kennara

Nánari upplýsingar á námskrá.is