"Er þetta ekki örugglega kvöldmatur?"

Þrír piltar frá Akureyri, Kristján Blær Sigurðsson, Þorsteinn Kristjánsson og Úlfur Logason, gerðu sér lítið fyrir á dögunum og sigruðu í sínum flokki í stuttmyndasamkeppninni Laterna Magica í Vesterålen í Noregi. Kristján Blær, sem er á fyrsta ári í VMA, segir að verðlaunamyndband þeirra félaganna, sem heitir „Þórgnýr“ sé rúmlega sex mínútna leikin heimildamynd um fyrsta íslenska mafíósann.

Þrír piltar frá Akureyri, Kristján Blær Sigurðsson, Þorsteinn Kristjánsson og Úlfur Logason, gerðu sér lítið fyrir á dögunum og sigruðu í sínum flokki í stuttmyndasamkeppninni Laterna Magica í Vesterålen í Noregi.  Kristján Blær, sem er á fyrsta ári í VMA, segir að verðlaunamyndband þeirra félaganna, sem heitir „Þórgnýr“ sé rúmlega sex mínútna leikin heimildamynd um fyrsta íslenska mafíósann.

Kristján Blær er á fyrsta ári á íþróttabraut VMA en félagar hans, Þorsteinn og Úlfur, eru á fyrsta ári í MA. Þeir kynntust í sjöunda bekk í Brekkuskóla á Akureyri og hafa brallað ýmislegt saman síðan. Í janúar sl. gerðu þeir tónlistarmyndband sem þeir sendu til þátttöku á Stuttmyndahátíðinni Stulla, sem er árleg stuttmyndahátíð ungs fólks á Norðurlandi, sem hefur verið haldin frá 2008. Myndband þeirra lenti í öðru sæti og í framhaldinu bauðst þeim að taka þátt í umræddi stuttmyndasamkeppni í Vesterålen, en samstarf er milli Menningarráðs Eyþings – samtaka sveitarfélaga í Eyjafjarðar- og Þingeyjarsýslum og Menningarráðs Vesterålen.
Þetta nýja rúmlega sex mínútna myndband þeirra þremenninga, sem er grín-heimildarmynd um 16 ára gamlan dreng sem telur sig vera fyrsta íslenska mafíósann, átti upp á pallborðið hjá frændum okkar í Norður-Noregi og það var valið það besta úr 28 innsendum myndböndum frá ungmennum á aldrinum 14-16 ára. Í heildarkeppninni voru 42 myndbönd og þar segir Kristján Blær að myndband þeirra félaganna hafi lent í öðru sæti.
Eins og í öllum alvöru samkeppnum fóru þeir þremenningar ásamt Gunnlaugi Víði Guðmundssyni frá Rósenborg til Vesterålen og veittu verðlaunum fyrir fyrsta sætið viðtöku.  

Laterna Magica er svæðisbundin kvikmyndahátíð fyrir börn og unglinga í Vesterålen sem fer fram í lok nóvember á hverju ári. Þetta var í 22. sinn sem hátíðin er haldin og er aðal markmið hennar að hvetja til kvikmyndagerðar meðal ungs fólks. Þetta er í fyrsta sinn sem kvikmynd frá kvikmyndahátíðinni Stulla tekur þátt í hátíðinni.

Kristján Blær segir að það hafi verið virkilega gaman að koma til Vesterålen, sem er lítill bær, á stærð við Dalvík, að hans sögn. „Þetta er mjög norðarlega í Noregi, dálítð fyrir norðan Ísland. Það var orðið dimmt þarna um tvöleytið og við grínuðumst með það, þegar við borðuðum hádegismatinn í myrkri, hvort þetta ætti ekki örugglega að vera kvöldmaturinn!“

Fólki gefst kostur á að sjá verðlaunamyndina „Þórgný“ á Stuttmyndahátíðinni Stulla sem verður haldin nk. laugardag, 7. desember, kl. 12:00 í Borgarbíói á Akureyri.  Þema hátíðarinnar þetta árið er heimildarmyndir en einnig verður svokallaður opinn flokkur þar sem má senda inn allt mögulegt eins og t.d. snjóbrettamyndir, grínmyndir, spennumyndir, dansmyndir, “stop-motion”, tónlistarmyndbönd eða annað. Frestur til að skila inn myndum rennur út á morgun, miðvikudaginn 4. desember.
Nánari upplýsingar á: https://www.facebook.com/stullistuttmynd Einnig er hægt að hafa samband við Birgi á bhstefansson@akureyri.is eða í síma 615-1502.