Bakstur og matreiðsla í fjarnámi

Það liggur í fljótu bragði ekki í augum uppi hvernig unnt er að kenna nemendum í matreiðslu og þjónustustörfum í fjarnámi en þá reynir á að hugsa hlutina í lausnum og það gerðu kennarar og nemendur á grunndeild matvælabrautar og nemendur í þriðja bekk í matreiðslu.

Ari Hallgrímsson, brautarstjóri matvælabrautar, segir að fjarnámið sé í raun tvískipt. Í grunndeildinni hafi nemendum verið kenndir bóklegir fagáfangar í gegnum Innu og það hafi gengið ágætlega. Í verklega hlutanum hafi verið sett upp sem hann kallar virkniverkefni og gengur það út á að nemendur hafa fengið það verkefni heima að annars vegar að baka og hins vegar að búa til mat að eigin vali fyrir fjölskylduna. Stofnaður hafi verið fb.hópur nemenda og kennara og þar setji nemendur inn myndir af bæði bakstrinum og matreiðslunni og matseðlunum skila nemendur á Innu. Hér má sjá myndir af heimabakstri nemenda sem þeir settu inn á fb.síðuna.

Um helmingur nemenda í grunndeildinni hafði lokið einnar viku vinnustaðanámi sínu á önninni áður en samkomubann tók gildi en hinum nemendunum verða fundin ákveðin verkefni í staðinn í fjarnámi.

Eins og komið hefur fram er á þessari önn þriðji bekkur í matreiðslu. Bóklegir fagáfangar eru kenndir í fjarnámi en verklega hlutanum þurfti að ýta til hliðar að svo komnu máli. Ari segir að staða þessara nemenda sé almennt góð og eftir sem áður sé við það miðað að þeir þreyti sveinspróf í maí nk., að því gefnu að ekki verði breyting á tímasetningu prófsins.