Halldóra Eydís með fyrirlestur í VMA
Á morgun, föstudaginn 1. nóvember, verður Halldóra Eydís Jónsdóttir
skóhönnuður með fyrirlestur í stofu M01 í VMA kl. 15. Fyrirlesturinn er á vegum listnámsbrautar VMA og Sjónlistamiðstöðvarinnar og
er aðgangur ókeypis og allir velkomnir. Halldóra er fyrrverandi nemandi í VMA en fór síðan í skóhönnunarnám í London.
Hönnun hennar er undir vörumerkinu HALLDORA.
Halldóra Eydís er fædd og uppalin í Mývatnssveit. Hún lærði myndlist og hönnun í VMA áður en hún hélt til
London í skóhönnunarnám. Myndlist, hönnun, skór og náttúra hafa ávallt verið aðaláhugamál Halldóru og
heimasveit hennar alltaf haft mikil áhrif á hönnun hennar og veitt henni innblástur. Þá skal þess getið að skósafn ömmu
Halldóru átti þátt í að móta þennan mikla skóáhuga, en henni þótti fátt skemmtilegra en að leika sér
með skóna hennar sem stelpa.
Árið 2010 útskrifaðist Halldóra Eydís með 1. einkunn í BA skóhönnunarnámi frá Cordwainers, London College of Fashion.
Upphafslína merkisins HALLDORA af náttúruvænum, einstökum hátískuskóm var síðan kynnt á tískuvikunni í Boston
árið 2011, Handverk og Hönnun í Ráðhúsi Reykjavíkur og New York sýningunni “Fashion Footwear Association of New York”.
Hráefnið sem Halldóra Eydís notar í samnefnda hönnunarlínu, HALLDORA, er að meirihluta íslenskt leður, fiskiroð, hrosshár
og kviku-hraunkristallar. Hönnunin er með öðruvísi yfirbragð og þægindi í huga, sem hentar konum á öllum aldri.