Ginnungagap - sýning á lokaverkefnum nemenda á listnáms- og hönnunarbraut - í Listasafninu

Næstkomandi laugardag, 20. nóvember, kl. 12-17 verður nemendasýning listnáms- og hönnunarbrautar VMA, Ginnungagap, opnuð. Sýningin verður opin á opnunartíma Listasafnsins á Akureyri til 28. nóvember nk.

Sýningar á lokaverkefnum nemenda hafa lengi verið fastur liður í starfsemi listnáms- og hönnunarbrautar VMA. Sýningarnar eru tvær yfir árið, annars vegar í lok vorannar og hins vegar í lok haustannar. Þetta er sjöunda árið í röð sem þær eru haldnar í samstarfi við Listasafnið á Akureyri.

Við undirbúning slíkra sýninga velja nemendur sér verkefni eftir áhugasviði þar sem þeim gefst tækifæri til að kynna sér nýja miðla eða dýpka skilning sinn á þeim sem þeir hafa áður kynnst.

Að baki verkanna liggur hugmynda- og rannsóknarvinna og leita nemendur víða fanga í eigin sköpunarferli, allt eftir því hvað hentar hverri hugmynd og þeim miðli sem unnið er með. Nemendur fá eina önn til að vinna að lokaverkefnum sínum og uppsetningu sýningar í samtali og samvinnu við leiðsagnarkennara og samnemendur þar sem frumkvæði, hugmyndaauðgi og öguð vinnubrögð eru lögð til grundvallar.

Þeir fjórir nemendur sem útskrifast af listnáms- og hönnunarbraut í næsta mánuði og eiga verk á sýningunni eru: Anna María Hjálmarsdóttir (textíllína), Ágúst Gígjar Valdemarsson (myndlistarlína), Elín Jóhanna Gunnarsdóttir (myndlistarlína) og Snæfríður Ægisdóttir (myndlistarlína).

Hver nemendanna er með eitt útskriftarverk á sýningunni í Ketilhúsinu.

Þessar myndir voru teknar í vikunni þegar nemendurnir unnu að því að setja verkin upp með dyggri aðstoð Bjargar Eiríksdóttur kennara og Haraldar Inga Haraldssonar, starfsmanns Listasafnsins á Akureyri.

Náttúruöfl – stafrænt ljósmyndaverk
Elín Jóhanna Guðmundsdóttir

Til hvers skal ég biðja nú? – innsetning
Ágúst Gígjar Valdemarsson

Förin til helvítis – stafrænt málverk
Snæfríður Ægisdóttir

Nútíma vampíra - textílverk
Anna María Hjálmarsdóttir