Mótorarnir greindir sundur og saman
Starf bifvélavirkjans er fjölbreytt og það tekur stöðugum breytingum í takt við breytingar á vélum og ökutækjum. En hvort sem bíllinn er rafmagnsbíll eða með dísel- eða bensínmótor er starf bifvélavirkjans í grunninn það sama; viðhald, viðgerðir eða breytingar. Og viðgerðirnar eru ótrúlega fjölbreyttar – og í mörgum tilfellum flóknar – og því þarf að vera fyrir hendi mikil þekking og reynsla til þess að takast á við þær.
Tölvan hefur heldur betur hafið innreið sína í þessari iðngrein eins og öðrum iðngreinum og þær hafa auðvitað færst inn í námið með t.d. bilanagreiningum o.fl. Og alltaf er eitthvað nýtt að gerast í afleggjurum bifvélavirkjunarinnar eins og t.d. bílaréttingum og bílamálun.
Ásgeir V. Bragason, meistari í bifvélavirkjun og án efa einn af reyndari bifvélavirkjun á Akureyri, tók við námsbraut í bifvélavirkjun á haustönn 2023. Námshópurinn sem hann fylgir núna úr hlaði, sem í eru níu nemendur, er því annar námshópurinn sem hann kennir. Fyrsta hópnum kenndi hann á sl. vetri, bæði bóklegar og verklegar greinar, og sá hópur er núna í starfsnámi.
Almenna reglan er sú að nemendur úr grunnskóla sem stefna á bifvélavirkjann þurfi fyrst að hafa lokið grunndeild málmiðngreina, sem tekur tvær annar, og síðan hefst námið í bifvélavirkjuninni. Fyrstu tvær annirnar eru bóklegt og verklegt nám í skóla, síðan tekur við tólf mánaða starfsnám og að því loknu taka aftur við tvær annir í bóklegu og verklegu námi í skóla. Að námi í skóla og starfsnámi á verkstæðum undir handleiðslu meistara loknu geta nemendur tekið sveinspróf og öðlast starfsréttindi og í framhaldinu er opin leið til meistararéttinda í faginu.
Það er að vonum óteljandi margt sem Ásgeir kennir nemendum sínum í bifvélavirkjuninni, enda býr hann yfir mikilli þekkingu og reynslu og hefur því miklu að miðla. Þegar litið var inn í verklega kennslustund í vikunni voru nemendur að kynna sér eitt og annað í mótorum, mældu og skrúfuðu sundur og saman.
Ásgeir segir afar mikilvægt hversu stjórnendur verkstæða á Akureyri og í nágrenni og aðrir sem tengjast þessari atvinnugrein séu almennt jákvæðir í garð námsbrautarinnar og vilji greiða götu hennar á ýmsan hátt. Fyrir það sé hann þakklátur. Enda sé það svo að það sé hagur allra þeirra sem starfa í þessari iðngrein að styðja við góða menntun á þessu sviði, þörfin fyrir fagmenntað fólk sé mikil. Ánægjulegt sé t.d. hversu vel hafi gengið að fá nemapláss fyrir alla þá þrettán nemendur sem stunduðu nám í bifvélavirkjuninni sl. vetur og séu núna í starfsnámi. Tólf þeirra starfi á verkstæðum á Akureyri og einn á Húsavík. Næsta vetur komi þessir nemendur síðan aftur inn í skólann en námshópurinn sem nú sé í skólanum fari í staðinn í starfsnám. Þannig gangi þetta koll af kolli.
Bifvélavirkjunin býr við þröngan kost í húsakynnum VMA en þess er vænst að úr því rætist með tilkomu hinnar væntanlegu nýju verknámsálmu, sem ríkisvaldið og sveitarfélögin í Eyjafirði hafa samþykkt að byggja við norðvesturhorn núverandi skólahúss. Í henni er gert ráð fyrir aðstöðu fyrir annars vegar byggingadeild skólans og hins vegar bifvélavirkjunina.