Luku 80 klukkustunda námskeiði í TIG-suðu
Í dag lauk með formlegum hætti í húsnæði málmiðnaðardeildar VMA námskeiði í málmsmíði – svokallaðri TIG-suðu, sem Símenntunarmiðstöð Eyjafjarðar stendur fyrir í samstarfi við VMA. Tíu luku námskeiðinu. Fyrir jól var annað námskeið í Mig/Mag suðu og þriðja námskeiðið í vetur hefst 4. apríl nk. þegar aðrir tíu nemendur fá einnig fræðslu í TIG-suðu. Námskeiðið er ítarlegt, í það heila eru kennt í 80 klukkustundir, sem samsvarar 120 kennslustundum og gefur það tíu einingar í framhaldsskóla. Kennarar á námskeiðinu voru Stefán Finnbogason og Kristján Kristinsson, kennarar við málmiðnaðarbraut VMA. Á námskeiðinu smíðuðu þátttakendur lítil ferðagrill, sem koma til með að nýtast vel í sumar.
Valgeir Magnússon, verkefnastjóri hjá SÍMEY, ávarpaði þátttakendur á námskeiðinu og afhenti þátttakendum skírteini til staðfestingar á því að þeir hefðu lokið námskeiðinu. Hann sagði greinilegt að mikill áhugi væri á slíkum verklegum smiðjum og því bæri að fagna. Til marks um það færi eftir páska af stað annað námskeið í TIG-suðu, aldrei áður hefðu tvö slík fullbókuð námskeið verið í boði á sömu önninni. Hann sagðist vænta þess að unnt yrði að bjóða upp á námskeið í pinnasuðu á haustönn.
Sem fyrr segir luku tíu málmsuðunámskeiðinu í dag – þar af níu karlar og ein kona – Arnbjörg Jóhannsdóttir, kennari og hjúkrunarfræðingur í Kvistási í Eyjafjarðarsveit. Um þessar mundir starfar hún reyndar ekki hvorki sem hjúkrunarfræðingur né kennari heldur starfar hún í fjölskyldufyrirtækinu, sem er verktakafyrirtækið Tývar ehf.
„Mig hefur lengi langað til þess að afla mér þekkingar á þessu sviði. Síðastliðið haust sá ég auglýst námskeið í Mig/Mag suðu og ákvað þá að fara langt út fyrir þægindarammann minn og stökkva út í djúpu laugina. Mér fannst óskaplega gaman að glíma við þetta og því ákvað ég að halda áfram og taka TIG-suðuna og núna bíð ég eftir því að taka pinnasuðuna. Bæði er þetta til gamans gert og einnig get ég nýtt mér þessa þekkingu á verkstæðinu heima. Ég hef alltaf haft gaman af handavinnu og hverskyns handverki og það má segja að þetta sé aðeins annar póll í handverki. Ég sé líka fyrir mér að geta nýtt mér þetta í að búa til ýmsa hluti sem mig hefur lengi langað til að gera. Reyndar hefur þetta kveikt í mér að læra meira á þessu sviði, þetta hefur til dæmis vakið áhuga minn á því að læra að nota rennibekkina hér. Aðstaðan hér í VMA er frábær og það er einstakt tækifæri að fá að nýta þessa aðstöðu og njóta tilsagnar þessara reynslumiklu og fróðu kennara – sem hafa báðir mikla kennslureynslu og reynslu úr atvinnulífinu. Og það er gaman að segja frá því að þeir hafa kennt báðum strákunum mínum hérna. Annar var hér í bifvélavirkjun og hinn tók pinnasuðunámskeið og fór síðan í gegnum raunfærnimat hjá SÍMEY,“ segir Arnbjörg.