Forseti Íslands í VMA í tengslum við forvarnardaginn

Í tilefni af forvarnardeginum sem var í dag kom hr. Ólafur Ragnar Grímsson forseti ásamt konu sinni frú Dorrit Moussaieff í heimsókn í skólann. Ásamt þeim voru fulltrúar frá ÍSÍ með í för þau Líney  Rut Halldórsdóttir framkvæmdastjóri og Viðar Sigurjónsson sviðsstjóri.Í tilefni af forvarnardeginum sem var í dag kom hr. Ólafur Ragnar Grímsson forseti ásamt konu sinni frú Dorrit Moussaieff í heimsókn í skólann. Ásamt þeim voru fulltrúar frá ÍSÍ með í för þau Líney  Rut Halldórsdóttir framkvæmdastjóri og Viðar Sigurjónsson sviðsstjóri.

Í ár er sjónum Forvarnardagsins í fyrsta sinn beint að framhaldsskólastiginu en hingað til hefur vettvangur dagsins verið í grunnskólunum eingöngu. Forsetinn hélt fund í M01 með nemendum sem voru áhugasamir og spurðu forsetann ýmsar spurningar varðandi forvarnir og vímuefni. Ólafur lagði áherslu á að nemendur hefðu sjálfir val um það hvernig þeir færu með líkama sinn og líf sitt og hvatti þau til að forðast áfengi og vímuefni. Þannig gætu þau lagt grunninn að heilbrigðu lífi til framtíðar. Eftir fundinn í M01 borðuðu Ólafur og Dorrit hádegisverð í Gryfjunni ásamt nemendum. Þau gáfu sér góðan tíma til að tala við nemendur og hvetja þau til góðra verka. Einnig gengu þau um skólann og hittu nemendur og kennara að störfum í kennslustundum.

Í tilefni forvarnardagsins í VMA mun Valgerður Dögg forvarnarfulltrúi bjóða nemendur velkomna í M01 kl. 17 þar sem boðið verður upp á bíó og pizzu fyrir þá nemendur sem kjósa að vera með í Allsgáður sem er klúbbur innan nemendafélagsins fyrir þá nemendur sem velja að vera án tóbaks, áfengis og annarra vímuefna en vilja skemmta sér vel saman. 

Öllum nemendum framhaldsskóla á landinu er boðið að taka þátt í skemmtilegri myndbandasamkeppni sem lýtur að grunngildum Forvarnardagsins. Allar leiðbeiningar um keppnina eru á heimasíðunni http://www.forvarnardagur.is. Auglýsingar hafa verið hengdar upp í VMA og nemendur eru hvattir til að taka þátt í keppninni. Skilafrestur er til 1. nóvember en keppnin er þegar hafin.

Sjá má fleiri myndir í myndasafni

Umfjöllun N4 er hér