Nemendur hvattir til að nýta sér þjónustu skólahjúkrunarfræðings
Ingibjörg Ösp Ingólfsdóttir hjúkrunarfræðingur hóf við upphaf þessa skólaárs störf sem skólahjúkrunarfræðingur VMA.
Ingibjörg er fædd og uppalin á Dalvík. Hún lauk stúdentsprófi frá Menntaskólanum á Akureyri árið 2001 og fór síðan í hjúkrunarfræði við Háskólann á Akureyri. Ingibjörg segist ekki hafa horft til hjúkrunar strax í æsku en smám saman hafi hún fundið að áhuginn beindist að því að hjálpa eða leggja öðrum lið. Þá hafi valið á hjúkrunarfræðinni ekki verið erfitt. Að námi loknu fór Ingibjörg að vinna á barnadeild Sjúkrhússins á Akureyri og hefur starfað þar með hléum síðan. Nýlega hóf hún síðan störf á heilsugæslu HSN á Akureyri sem felur í sér annars vegar skólahjúkrun í VMA og hins vegar í Brekkuskóla á Akureyri.
Mér finnst þetta mjög fjölbreytt og skemmtileg vinna. Dagarnir eru misjafnir, suma daga er rólegt og aðra daga er mikið að gera. Nemendur geta bókað viðtal hjá mér í gegnum heimasíðu VMA og einnig er velkomið að líta við hjá mér í C-álmu þá tvo daga sem ég hef hér viðveru, sem er á þriðjudögum kl. 10-12 og 13-15 og á miðvikudögum kl. 12-15. Og einnig er nemendum velkomið að senda á mig tölvupóst. Mér finnst mikilvægt að nemendur nýti sér þessa þjónustu. Ef ég get ekki leyst úr þeirra málum á staðnum get ég vísað þeim áfram veginn, t.d. til sálfræðings og annarra sérfræðinga í heilbrigðiskerfinu.
Það hefur verið nóg að gera að undanförnu hjá Ingibjörgu Ösp því auk þess að sinna sínum daglegum störfum varði hún á dögunum meistaraverkefni sitt í lýðheilsuvísindum við Háskóla Íslands. Námið hefur hún stundað síðustu þrjú árin, að mestu leyti í fjarnámi, og lýkur því formlega með brautskráningu frá HÍ síðar í þessum mánuði.
Sem að framan greinir er Ingibjörg Ösp með skrifstofu í C-álmu skólans. Hún er með netfangið ingibjorg.osp.ingolfsdottir@vma.is
Allar frekari upplýsingar um þjónustu Ingibjargar hjúkrunarfræðings er að finna hér á heimasíðu skólans.