Opið fyrir umsóknir um fjarnám á vorönn 2018 til 10. janúar

Nú stendur yfir skráning í fjarnám VMA og er umsóknarfrestur til miðvikudagsins 10. janúar. 

Efst hér á forsíðu heimasíðunnar er flipi þar sem allar upplýsingar um fjarnámið er að finna, m.a. eru þar upplýsingar um áfangana sem eru í boði núna á vorönn 2018. Nánari upplýsingar veitir Baldvin B. Ringsted, sviðsstjóri verk- og fjarnáms.

Fjarnámið gerir nemendum kleift að auka við sig áföngum með dagskóla t.d. nemendur í iðn- og verknámi bæta við sig bóklegum áföngum í fjarnámi til að bæta við einingum til stúdentspróf. Margir nemendur skólans og annarra skóla hafa nýtt sér fjarnám skólans til að útskrifast af fleiri en einni braut og/eða til að ljúka námi á styttri tíma en skipulag gerir ráð fyrir. Hér má m.a. lesa viðtal við Björn Vilhelm Ólafsson sem útskrifaðist í desember s.l. og var fyrsti nemandinn til að útskrifast sem stúdent samkvæmt nýrri 3ja ára námsskrá til stúdentsprófs. Björn Vilhelm nýtti sér fjarnámið til að klára námið á óvenjulega skömmum tíma, tveimur og hálfu ári.

Þá eru alltaf nemendur sem nýta sér fjarnámið í skólanum til að stunda nám með vinnu eða vegna þess að aðstæður í heimabyggð bjóða ekki upp á nám á framhaldsskólastigi. 

Fjarnám í VMA byggist á kennsluleiðbeiningum og verkefnum í gegnum kennsluvefinn Moodle, í gegnum Google og/eða með tölvupóstsamskiptum. Nemendur skila verkefnum í gegnum vefinn og geta tekið lokapróf í sinni heimabyggð í samráði við samstarfsaðila. 

Nám, námsefni, yfirferð, kennsla og kröfur í fjarkennslu VMA eru í samræmi við kröfur í dagskóla. Námsgögn geta verið alfarið á Moodle/Google-síðu áfangans og/eða kennslubækur sem hægt er að kaupa í bókabúðum. Í námsáætlun kemur fram það námsefni sem liggur að baki áfanganum, upplýsingar um yfirferð og skipulag námsins ásamt upplýsingum um námsmat. Nemendur fá námsáætlun í upphafi annar.

Rétt er að undirstrika að iðnmeistaranám er í boði í fjarnámi VMA og er það fyrir þá sem lokið hafa sveinsprófi í iðngrein. Iðnmeistaranám skiptist í megindráttum í þrennt: almennt bóknám, nám í stjórnunar- og rekstrargreinum og fagnám. Almennt bóknám ásamt stjórnunar- og rekstrargreinum skiptist í kjarna (skyldunám) annars vegar og valnám hins vegar og er valnámið mismikið að vöxtum eftir iðngreinum. Í meistaraskóla VMA er unnt að ljúka námi í almennum bóknámsgreinum og stjórnunar- og rekstrargreinum. Vorönn 2018 er síðasta önnin þar sem kennt er samkvæmt eldri námsskrá iðnmeistara en nám samkvæmt nýrri námsskrá hefst haustið 2018. 

Hér er hægt að sækja um fjarnámið í VMA.