Prufur fyrir Litlu hryllingsbúðina 30. ágúst

Eins og fram hefur komið ræðst Leikfélag VMA ekkki á lágan garð á þessum vetri því ákveðið hefur verið að setja upp söngleikinn Litlu hryllingsbúðina og er frumsýning áætluð 21. október nk. í Samkomuhúsinu. Það er því ekki því eftir neinu að bíða og strax í næstu viku fer vinnan í fullan gang á öllum vígstöðvum. Reyndar er þegar búið að vinna töluverða undirbúningsvinnu en strax og búið verður að velja í hlutverk í sýningunni hefjast æfingar af krafti. Á þriðjudag í næstu viku, 30. ágúst, kl. 17 verða prufur í M01 fyrir sýninguna og í framhaldi af þeim ætti að ráðast hverjir verða valdir í þau hlutverk í sýningunni sem eru í boði – 9-10 hlutverk. Hér má sjá hvað væntanlegir leikarar þurfa fram að færa í prufunni. Viðstaddir prufurnar verða leikstjórinn, Birna Pétursdóttir, og söngstjórinn, Hera Björk Þórhallsdóttir. Tónlistarstjóri sýningarinnar verður Friðrik Ómar Hjörleifsson.

En það þarf ekki bara að manna í hlutverk í sýningunni. Fjölmarga vantar til þess að vinna að sýningunni á einn eða annan hátt, t.d. förðun, búningagerð, leikmunagerð, tæknimál o.fl. Allir þeir sem kynnu að hafa áhuga á að vinna við uppfærsluna - annað en að leika - eru hvattir til að gefa sig fram. Hafið samband við Ólaf Göran, varaformann Þórdunu (varaformadur@thorduna.is)

Söngleikurinn Litla hryllingsbúðin er eftir Alan Menken (tónlist) og Howard Ashman (texti) og byggður á samnefndri kvikmynd frá árinu 1960. Mörg þekkt lög eru í sýningunni, t.d. Snögglega Baldur, Þú verður tannlæknir og Gemmér.  

Litla hryllingsbúðin segir frá munaðarleysingjanum Baldri sem lifir frekar óspennandi lífi. Hann vinnur í lítilli blómabúð í skuggahverfi borgarinnar, hjá Músnikk, sem tók Baldur í fóstur. Viðskiptin ganga fremur illa og blómabúðin er um það bil að leggja upp laupana. Í blómabúðinni vinnur einnig Auður, sæt ljóska sem Baldur er ástfanginn af. En hún á kærasta, leðurklæddan og ofbeldisfullan tannlækni, sem ferðast um á mótorhjóli og beitir Auði ofbeldi. Dag einn kaupir Baldur dularfulla plöntu, sem hann nefnir Auði II. Eftir því sem plantan vex og dafnar aukast viðskiptin stöðugt meira í blómabúðinni og Baldur verður sífellt vinsælli. Kvöld eitt uppgötvar hann að plantan getur talað og hún lofar honum frægð og frama, gulli og grænum skógi. En sá galli er á gjöf Njarðar að plantan nærist á mannablóði og vill helst fá ferskt mannakjöt að borða. Matarvenjur plöntunnar eiga eftir að hafa skelfilegar afleiðingar.

Hér á landi hefur Litla hryllingsbúðin verið sett upp þrisvar sinnum í atvinnuleikhúsum. Einnig hefur Hryllingsbúðin verið sýnd af áhugamannaleikhópum víða um landið, s.s. í grunn- og framhaldsskólum.

Fyrsti atvinnuleikhópurinn sem sýndi Litlu hryllingsbúðina á Íslandi var Hitt leikhúsið. Sýnt var í Gamla bíó  í Reykjavík og var frumsýnt í janúar 1985. Sýningum lauk í byrjun desember sama ár og voru þær þá orðnar fleiri en 100. Sýningargestir urðu u.þ.b. 50.000 og fram að þeim tíma hafði aðeins eitt leikhúsverk verið betur sótt á Íslandi: Fiðlarinn á þakinu. Í þessari sýningu léku m.a. Leifur Hauksson (útvarpsmaður á Rás 1) (Baldur), Edda Heiðrún Backmann (Auður) og Laddi (Ómar tannlæknir). Næst setti Leikfélag Reykjavíkur uppi Litlu hryllingsbúðina í Borgarleikhúsinu í júní 1999. Að þessu sinni var það Gísli Rúnar Jónsson sem þýddi og staðfærði verkið, en áfram var notast við söngtexta Megasar. Sýningar urðu samtals 66 og sýningargestir urðu 29.603. Þar fór Valur Freyr Einarsson með hlutverk Baldurs Snæs og Þórunn Lárusdóttir lék Auði. Stefán Karl Stefánsson fór með hlutverk tannlæknisins.

Þriðja íslenska atvinnuleiksýningin á Hryllingsbúðinni var sett upp af Leikfélagi Akureyrar, í samstarfi við Íslensku óperuna og var hún frumsýnd 24. mars 2006 í Samkomuhúsinu á Akureyri. Guðjón Davíð Karlsson fór með hlutverk Baldurs, Vigdís Hrefna Pálsdóttir lék Auði, og  Jóhannes Haukur Jóhannesson túlkaði tannlækninn. 

Sem fyrr segir leikstýrir Birna Pétursdóttir uppfærslu Leikfélags VMA á Litlu hryllingsbúðinni. Hún er leiklistarmenntuð frá Bretlandi en hefur undanfarin ár starfað við dagskrárgerð á sjónvarpsstöðinni N4 á Akureyri.