Síðustu sýningar á Tröllum nk. sunnudag

Næstkomandi sunnudag verða síðustu sýningar Leikfélags VMA á leikritinu Tröllum í Menningarhúsinu Hofi. Í upphafi voru ákveðnar fjórar sýningar á verkinu í stóra salnum í Hofi en vegna mikillar aðsóknar var ákveðið að bæta við tveimur sýningum og verða þær nk. sunnudag, 8. mars kl. 14 og 17. Rétt er að undirstrika að þetta verða síðustu sýningar á verkinu og því er tækifærið núna til þess að drífa sig í leikhús og sjá þessa flottu sýningu Leikfélags VMA. Miða er hægt að panta á annað hvort Mak.is eða Tix.is.

 

Elísabeth Ása Eggerz, formaður Leikfélags VMA og aðstoðarleikstjóri sýningarinnar, segir að viðtökurnar hafi farið fram úr björtustu vonum og er hún þakklát fyrir frábærar undirtektir leikhúsgesta sem hafa fjölmennt í leikhúsið. „Ég held að mér sé óhætt að segja að sýningin hafi gengið betur en við þorðum að vona. Sýningin höfðar til allra og hún hittir greinilega í mark hjá krökkunum sem hafa skemmt sér vel. Það hefur ekki verið mikið um barnaleikrit á fjölunum hér fyrir norðan á síðustu mánuðum og ég held því að við höfum sýnt Tröll á hárréttum tíma. Einnig hefur það haft sitt að segja að verkið er nýtt og hefur vakið forvitni leikhúsgesta,“ segir Elísabeth.

 

Sem fyrr segir var Elísabeth aðstoðarleikstjóri. Hún segir að í sýningum Leikfélags VMA undanfarin ár hafi hún verið í búningadeildinni og því hafi aðstoðarleikstjórnin verið ný og „hrikalega skemmtileg upplifun.“