Skiptir máli að flokka sorp?
Hvað verður um sorpið okkar? Þetta var ein af þeim spurningum sem Helgi Pálsson, rekstrarstjóri Gámaþjónustu Norðurlands, leitaðist við að svara í fyrirlestri sem hann hélt í VMA í gær. Fyrirlesturinn var liður í þemavikunni í skólanum þar sem umhverfismál frá ýmsum hliðum eru viðfangsefnið. Hér eru glærur sem Helgi varpaði upp í fyrirlestrinum.
Helgi sagði að Gámaþjónustan starfaði á svæðinu frá Ólafsfirði og austur í Ásbyrgi og fyrirtækinu hafi mjög vaxið fiskur um hrygg á síðustu árum. Nú eru 42 stöðugildi í fyrirtækinu, sem segir töluvert um umfangið og hraðan vöxt í flokkun sorps og úrvinnslu þess í verðmæti.
Á síðasta ári flutti Gámaþjónusta Norðurlands út 2.800 tonn til endurvinnslu. Til urðunar á urðunarstað milli Skagastrandar og Blönduóss fóru um 8.000 tonn en lífrænn úrgangur til moltugerðar hjá Moltu í Eyjafjarðarsveit var 2.750 tonn. Til samanburðar fóru um 20 þúsund tonn af sorpi í urðun á Glerárdal, ofan Akureyrar, fyrir hálfum öðrum áratug. Árangurinn er því ótvíræður, mun minna fer til urðunar en á árum áður.
Helgi segir að almennt vandi Akureyringar sig við flokkun á sorpi og á landsvísu séu grenndarstöðvarnar í bænum, sem eru ellefu talsins, einstakar. Hins vegar sagði hann að eftir að hafa kynnt sér sorp- og endurvinnslumál í VMA sé augljóst að þar megi gera mun betur. Hann sagði að á síðasta ári hafi heildarmagn sorps í VMA numið um 25 tonnum, þar af hafi 60% verið blandaður úrgangur en það hlutfall þyrfti að vera 42%. Miðað við að hellt sé upp á 45 kaffikönnur í VMA á dag, sem er ekki fjarri lagi, falla til um 39 kg af kaffikorgi á viku eða á þriðja tonn á ári. Að öllu samanlögðu sagði Helgi að átaks í flokkun sorps væri þörf í VMA og upplýsti Sigríður Huld Jónsdóttir skólameistari í gær að í slíkt átak yrði ráðist, ákveðið væri að VMA færi í samstarf við Gámaþjónustu Norðurlands um úrbætur í umhverfismálum í skólanum.