Tækni og fjórða iðnbyltingin - Þemavika í VMA

Vikuna 12. -16. mars er þemavika í VMA tileinkuð tækni og fjórðu iðnbyltingunni. Hér má sjá dagatal með ýmsum viðburðum í vikunni. Nemendur og kennarar geta komið við í opnum kennslustundum eða á kynningar og fyrirlestra. Eins munu kennarar fjalla um tækni og fjórðu iðnbyltinguna í kennslustundum í áföngum. Ekki er gert ráð fyrir að felld sé niður kennsla þessa viku vegna þemadaganna. 

Fjórða iðnbyltingin svokallaða breytir lífsháttum okkar og störfum og það er grundvallaratriði að menntakerfið sé í stakk búið til þess að undirbúa nýjar kynslóðir fyrir þessar miklu breytingar. Lilja Alfreðsdóttir mennta- og menningarmálaráðherra hefur lagt mikla áherslu á tækni og hlutverk framhaldsskólanna hvað varðar það að undirbúa nemendur undir breytt atvinnulíf og samfélag þar sem tæknin er síbreytileg.  Í ávarpi sínu á fundi Félags atvinnurekenda í byrjun febrúar s.l. kom mennta- og menningarmálaráðherra víða við, m.a. ræddi hún þá grunnfærni sem þarf að vera til staðar í menntakerfinu og mikilvægi samspils menntunar og atvinnulífs. Hún sagði: „Við sem störfum að menntamálum gerum okkur fulla grein fyrir því að menntakerfið stendur frammi fyrir erfiðum spurningum og úrlausnarefnum. Hvaða hæfni mun atvinnulífið sækjast eftir á næstu fimm til tíu árum? Er hægt að skilgreina betur grunnfærni sem allir þurfa að tileinka sér? Skólastarf þarf að undirbúa nemendur undir líf og starf í síbreytilegu hátæknisamfélagi.“

Þemavikan í VMA er ein leið til að efla umræðu um tækni í störfum okkar og í námi nemenda við skólann.