VMA á Mín framtíð 2019

Fimmtán nemendur úr VMA taka þátt í Íslandsmóti iðn- og verkgreina sem hefst í Laugardalshöllinni í Reykjavík í dag og lýkur nk. laugardag. Með þeim verða nokkrir kennarar og einnig verða Sigríður Huld Jónsdóttir, skólameistari og Svava Hrönn Magnúsdóttir, námsráðgjafi, í Laugardalshöllinni þessa daga að kynna VMA, en skólinn verður með sameiginlegan kynningarbás með MA þar sem skólarnir verða kynntir, skólabærinn Akureyri og Heimavist MA og VMA.

Íslandsmót iðn- og verkgreina ber að þessu sinni yfirskriftina Mín framtíð 2019. Að þessu sinni verður keppt í bakaraiðn, bifreiðasmíði, bifvélavirkjun, bílamálun, blómaskreytingum,  fataiðn, forritun, framreiðslu, grafískri miðlun, gull- og silfursmíði, hársnyrtiiðn, hönnun vökvakerfa, kjötiðn, kælitækni, leguskiptum, matreiðslu, málaraiðn, málsmuðu, múraraiðn, pípulögnum, rafeindavirkjun, rafvirkjun, skrúðgarðyrkju, snyrtifræði, trésmíði og vegg- og dúkfóðrun.

Nemendurnir fimmtán frá VMA sem taka þátt í Íslandsmótinu í ár skiptast svo á deildir skólans: Rafiðn - 5 nemendur, háriðn - 3 nemendur, málmiðngreinar - suðukeppni - 4 nemendur, vélstjórn - 2 nemendur og byggingadeild - 1 nemi.

Í það heila mun á fjórða tug skóla kynna starfsemi sína í Laugardalshöllinni í tengslum við Íslandsmót iðn- og verkgreina.

Einnig verða þar með kynningar BMX BRÓS, Erasmus +, FabLab Reykjavík, Fagkonur, Félag náms- og starfsráðgjafa, Iðan fræðslusetur, Iðnú, Kvasir- samtök símenntunarmiðstöðva, Samband íslenskra framhaldsskólanema, Rafmennt, Team Spark og Verksmiðjan RÚV.

Í dag og á morgun er gert ráð fyrir því að um 7000 grunnskólanemar leggi leið sína í Laugardalshöllina til þess að fá á einu bretti upplýsingar um það nám sem stendur þeim til boða að grunnskólanum loknum.

Næstkomandi laugardag verður efnt til fjölskyldudags í Laugardalshöll frá kl.10:00 til 16:00 þar sem fólk getur komið og fengið upplýsingar, fylgst með og gert ýmislegt skemmtilegt. Í boði verður m.a. að helluleggja, klippa, flétta, krulla eða slétta hár, teikna grafík í sýndarveruleika, splæsa net, fara í ratleik, fara á ýmis örnámskeið, mæla blóðþrýsting, planta fræjum, þrívíddarprentun, smíða, prófa vélmenni, bora, sauma á iðnaðarsaumavél, leysa þrautir og fá verðlaun, sjá mjaltir og rúningu og að taka þátt í að útbúa lengstu blómaskreytingu sem gerð hefur verið á Íslandi.

Vert er að undirstrika að ókeypis aðgangur er í Laugardalshöllina.

Dagskráin þessa þrjá daga er sem hér segir:

Fimmtudagur 14. mars
kl. 08:20 Opnunarhátíð
kl. 09:10 Keppni á Íslandsmóti hefst og „Prófaðu“ básar
kl. 09:10 Framhaldsskólakynning hefst
kl. 14:00 Opið fyrir almenning
kl. 16:30 Keppni á Íslandsmóti frestað til morguns
kl. 17:00 Framhaldsskólakynningu lýkur

Föstudagur 15. mars
kl. 08:30 Keppni á Íslandsmóti heldur áfram og „Prófaðu“ básar
kl. 09:00 Framhaldsskólakynning hefst
kl. 14:00 Opið fyrir almenning
kl. 16:30 Keppni á Íslandsmóti frestað til morguns
kl. 17:00 Framhaldsskólakynningu lýkur

Laugardagur 16. mars
kl. 10:00 Keppni á Íslandsmóti heldur áfram
kl. 10:00 Fjölskyldudagur – Fjör og fræðsla Framhaldsskólakynning og „Prófaðu“ básar
kl. 15:00 Keppni á Íslandsmóti lýkur
kl. 16:00 Kynningu lýkur og hús lokar
kl. 16:30 Lokahátíð og verðlaunaafhending