Embla Sól Pálsdóttir sigraði Sturtuhausinn - söngkeppni VMA
Embla Sól Pálsdóttir sigraði Sturtuhausinn – söngkeppni VMA sem fram fór í Menningarhúsinu Hofi í gærkvöld. Hún söng lag Melanie Martinez, Toxic, til sigurs með miklum glæsibrag. Fimmtán lög voru flutt af jafnmörgum flytjendum og var kvöldið hið veglegasta í alla staði.
Að vonum var Embla Sól kampakát að keppninni lokinni. Hún segist hafa sungið frá barnæsku og hafi lengi langað til þess að standa í þessum sporum. Fyrir sig sé sigurinn því stór. "Ég hef oftast verið mjög stressuð að koma fram, en ekki núna. Þetta var mjög gaman," segir Embla Sól en hún er sextán ára gömul og er á fyrsta ári á listnámsbraut VMA. Hún er vissulega með hin ýmsu listagen og er í því sambandi nærtækt að nefna að faðir hennar, Jón Páll Eyjólfsson, er leikhússtjóri hjá Menningarfélagi Akureyrar. Leiklistar- og sönggenin kemur hún til með að nýta aftur á sviðinu í Hofi þegar Ávaxtakarfan verður sett þar á svið í febrúar. Þar mun Embla Sól leika Evu appelsínu. Hún segist hlakka mikið til þeirrar sýningar enda gangi æfingar vel.
Í öðru sæti í Sturtuhausnum í gærkvöld var Arndís Eva Erlingsdóttir. Hún flutti lag Cher, Believe. Þriðja sætið hreppti Ragnheiður Diljá, hún söng lagið Omen með Disclosure ft. Sam Smith.
Hljómsveit kvöldsins fór á kostum enda skipuð afbragðs hljóðfæraleikurum; Hallgrími Jónasi Ómarssyni á gítar, Valgarði Óla Ómarssyni á trommur, Stefáni Gunnarssyni á bassa og Vilhjálmi Sigurðssyni á hljómborð og trompet.
Dómnefndinni var vandi á höndum, enda mörg frambærileg atriði á sviðinu í Hofi í gærkvöld. Í nefndinni voru Lára Sóley Jóhannsdóttir, fiðluleikari, söngvari og lagahöfundur, Valdís Eiríksdóttir - Vala Eiríks útvarpskona á FM957 og fyrrum VMA nemandi og Jón Jósep Snæbjörnsson/Jónsi söngvari. Vilhelm Anton Jónsson/Villi naglbítur var kynnir kvöldsins og flutti hann með miklum tilþrifum hið vinsæla lag 200 þúsund naglbíta, Láttu mig vera.
Söngkeppni VMA er alltaf einn af stóru viðburðunum í félagslífinu í skólanum og nú var hún haldin á haustönn – sem er óvenjulegt því hún hefur jafnan verið haldin eftir áramót. En þar sem fyrirsjáanlega verða stórir viðburðir á dagskrá í félagslífinu eftir áramót – með frumsýningu á Ávaxtakörfunni í febrúar og árshátíð nemenda í mars – þótti rétt að dreifa stórviðburðum vetrarins á allan veturinn og því var ákveðið að hafa söngkeppnina núna í nóvember.
Til upprifjunar - sigurlög Sturtuhaussins í síðustu þrjú skipti: