Hjalti Jón Sveinsson kjörinn formaður
Framhaldsskólar kjósa sér einn málsvara.
Hjalti Jón Sveinsson kjörinn formaður Félags íslenskra framhaldsskóla og Skólameistarafélags Íslands.
Á aðalfundum Félags íslenskra framhaldsskóla (FÍF) og Skólameistarafélags Íslands (SMÍ) sem haldnir voru í
Menntaskólanum á Egilsstöðum 5. og 6. júní voru ákveðnar breytingar á stjórnum félaganna. Afráðið var að einn
formaður skyldi starfa fyrir bæði félögin fram til næsta aðalfundar. Tímanum yrði meðal annars varið til þess að endurskoða
lög félaganna og jafnvel með hliðsjón af því hvort þau verði sameinuð að öllu eða nokkru leyti sem eitt félag
stjórnenda í framhaldsskólum. Fundarmenn voru sammála um að á tímum mikillar þróunar og breytinga á vettvangi
framhaldsskólanna væri mikilvægt að einn og sami aðilinn væri í forsvari fyrir skólastigið.
Ársæll Guðmundsson, skólameistari Iðnskólans í Hafnarfirði, gaf ekki kost á sér til áframhaldandi setu sem formaður SMÍ,
þar eð hann fer í ársleyfi til þess að vinna að sérstökum verkefnum fyrir Mennta- og menningarmálaráðuneytið. Guðrún
Hrefna Guðmundsdóttir, skólameistari Fjölbrautaskólans í Breiðholti, gaf ekki kost á sér til áframhaldandi setu sem formaður
FÍF en mun sitja áfram í stjórn.
Hjalti Jón Sveinsson, skólameistari Verkmenntaskólans á Akureyri, var kjörinn formaður beggja
félaganna.