Snjórinn nýttur til skúlptúragerðar

Tveir af snjóskúlptúrunum.

Alþekkt er að búa til einfalda og klassíska snjókarla en það má líka búa til snjóskúlptúra af ýmsum toga. Það gerðu nemendur í skúlptúráfanga hjá Helgu Björg Jónasardóttur í gær. Nemendur hafa nýtt sér allt milli himins og jarðar í áfanganum til þess að búa til skúlptúra og nú var komið að því að nota snjóinn sem skúlptúrahráefni. Og ekki er annað að sjá en að hugmyndaflugið hafi notið sín í ríkum mæli.

Þessir snjóskúlptúrar fá þó ekki eilíft líf því í dag og á morgun er spáð nokkurra stiga hita og því hætt við að hráefnið láti undan síga.